Serisë së pafund të shkrimeve që shtypi botëror dhe në veçanti ai në gjuhën gjermane i ka kushtuar suksesit sensacional të Përfaqësuese së Kosovës, i është shtuar edhe ai i botuar sot në gazetën më prestigjioze gjermane, “Frankfurter Allgemeine Zeitung”.
“Jemi gati të vdesim në këtë vend” e ka titulluar “FAZ” artikullin në të cilin merret me sfondin historik dhe politik të “fenomenit Kosova” në futbollin botëror.
Ndërsa vetë fjalët e titullit, gazeta i ka marrë nga deklarata e heroit të fitores kundër Çekisë, Vedat Muriqit, shkruan albinfo.ch.
“Bashkëlojtarët e mi dhe unë jemi të gatshëm të vdesim në fushë. Ne përpiqemi që të japim 1000 për qind për këtë fanellë dhe për këtë vend”, citohet më tej Muriqi.
