Policia bullgare ka identifikuar 15 tifozë, gjashtë prej të cilëve kanë përfunduar në pranga. Tifozët dyshohet se janë përgjegjës të abuzimeve raciste ndaj futbollistëve të Anglisë.
Akti i turpshëm ndodhi në ndeshjen kualifikuese të Euro 2020, teksa policia vendase bën me dije se tre të tjerë janë shpallur në kërkim.
“Ne nuk e tolerojmë një sjellje të tillë,“ tha komisioneri i Ministrisë së Brendshme të Bullgarisë, Georgi Hadzhiev.
Më i ashpër ka qënë legjenda bullgare, Hristo Stoichkov, i cili ka kërkuar nga organet kompetente që të marrë masa ndëshkimore për tifozët dhe kombëtaren e tij.
“Duhet të dënohen me të paktën 5 vite pa shkuar në stadium. Njerëzit nuk duhet të vuajnë,” tha shkurtimisht Stoichkov.
Ndërkohë, Shoqata Angleze e Futbollit dhe UEFA kanë dënuar veprimet e seksionit ‘ultras’ të tifozëve të Bullgarisë, me presidentin, Aleksander Ceferin që ka bërë thirrje për “familjen e futbollit dhe qeveritë” për të “zhvilluar luftë kundër racistëve” .
