Anglia, e cila arriti në gjysmëfinalen e Kupës së Botës 2018, do të fillojë fushatën e saj në “Euro 2020” kundër Kroacisë në stadiumin “Wembley” më 14 qershor.
Duke reaguar ndaj shortit që i rezervoi Kroacinë dhe Republikën Çeke, trajneri i kombëtares së “Tre Luanëve”, Gareth Southgate deklaroi: “Nuk jam edhe aq i sigurt që patëm fat dhe është një short i mirë ai që u hodh në Bukuresht. Pozitiv është fakti që i njohim rivalët sepse kemi luajtur me dy prej tyre më parë. Fakti që do të kemi mundësi të mbështetemi nga tifozët tanë e për më tepër në “Wembley”, i bën edhe më të veçanta ndeshjet e grupit tonë në Europian.”
Më pas tekniku 49-vjeçar kalon në analizën e rivalëve, me Kroacinë që është gjithashtu kandidate për kreun e grupit. “I njohim cilësitë e kroatëve dhe e dimë që i përkasin një niveli shumë të lartë, por i tillë është futbolli sot dhe është e kotë të presim për kundërshtarë të dobët.
Me Zlatkon (Daliç) e kam një fotografi, por ndeshja mes nesh do të jetë rast për një tjetër foto kujtim. Jam shumë i kënaqur me ekipin tim, ishim më të rinjtë në eliminatoret e fundit, por kjo nuk do të jetë kurrsesi një alibi”, përfundoi Sauthgejt.