Drejtuesit e Skënderbeu kanë nisur punën për të bërë goditjet e duhura në merkaton e dimrit, në mënyrë që të kënaqnin trajnerin Ilir Daja.
Korçarë janë duke mbikëqyrur futbollistë, që mund të dalin të lirë nga ekipet ku luajnë aktualisht. Rasti ideal është ai i Dorian Kërçikut, i cili sapo është larguar nga Tirana duke mbyllur bashkëpunimin me bardheblutë.
Për Kërçikun duket se bisedimet janë në rrugën e duhur, por Skënderbeu është duke pritur zhvillimet të reja, për një tjetër mbrojtës të Tiranës. Bëhet fjalë për Eni Imamin, i cili pëlqehet mjaft nga trajneri i Skënderbeut. Korçarët janë duke studiuar me kujdes situatën dhe nëse Imami kërkon të ndryshojë ambient, bardhekuqtë e presin krahë hapur.
Por në rast se kjo tratativë do të dështonte drejtuesit e Skënderbeut janë duke monitoruar një tjetër pistë. Bëhet fjalë për Esin Hakajn e Partizanit, i cili ashtu si Imami, nuk ka pasur shumë minuta gjatë këtij sezoni.