Në 10 janar do të zbresin në fushën e “Air Albania” legjenda të Kombëtares shqiptare, ish-lojtarë të Italisë kampione bote në 2006-ën, ish-futbollistë kampionë Europe me Greqinë në 2004 dhe ish-lojtarë të Turqisë, që në vitin 2002 u rendit e treta në Botëror.
Përmes një pyetësori në “Instagram”, Andi Lila ka zbuluar shumë detaje për sa i përket ndeshjes që do të zhvillohet. “Do jenë dy gjysmë finale nga 35 minuta, më pas do të luhet finalja. Agustin Kola është i ftuar nderi në stadium, së bashku me Geri Cipin. Trajner do të jetë Ilir Shulku.
A do të aktivizohem unë? Po luajnë më të mirët, ata që vendosën themelet e një kombëtareje kaq të fortë. Bledar Kola është i ftuar, por presim përgjigjen përfundimtare. Ai është pjesëtar i Golden Team Albania.
Shqipëria në finale? Uroj që të ketë spektakël dhe të fitojë më i miri. Të kënaqemi të gjithë dhe të bëjmë disa familje të lumtura me rindërtimin e shtëpive. Të gjithë në stadium për një qëllim të jashtëzakonshëm.
De Biasi do të jetë trajneri i Italisë. Do të jetë edhe Foto Strakosha. Del Piero? Presim Roberto Baggion.”, shkruan Lila.
Nëpërmjet këtij pyetësori Lila ka treguar shumë detaje, përsa i përket ndeshjes që do të zhvillohet në 10 janar, dhe të ardhurat do të shkojnë për të gjithë të prekurit nga tërmeti.
