“Lega Calcio” njoftoi të premten në mbrëmje se nuk ka ndërmend ta pezullojë përfundimisht Serie A, por ta rifillojë kampionatin posa të ketë kaluar gjithçka; mbase me ndeshje të ngjeshura mes majit dhe qershorit, duke llogaritur shtyrjen e “Euro 2020”.
Për këtë, presidentët e klubeve biseduan me njëri-tjetrin në një video-konferencë. Por, përveç të folurit për atë se si dhe nëse do të fillojë të luhet përsëri kampionati, brenda disa javësh, një temë tjetër e rëndësishme e debatit ka të bëjë me stërvitjet.
Pyetja shtrohet e tillë: A duhen ndaluar skuadrat të stërviten apo është e drejtë t’u jepet liri në këtë drejtim? Sipas asaj që raporton “Gazzetta dello Sport”, kishte dy palë mjaft të dallueshme për këtë temë.
Presidenti i Lazios, Lotito, i mbështetur nga kolegu i tij i Napolit, De Laurentiis, argumentoi se trajnimi nuk mund të ndërpritet, madje edhe për arsye ligjore, dhe se ai duhet të rifillojë sa më shpejt të jetë e mundur. Për të dy do të ishte e dobishme që lojtarët të mbahen në karantinë, në një kontroll më të madh. Andrea Agnelli u përgjigj me ton, për të kundërtën. Pas “kodeve” të palëve, duket se predominon vetëm një interes: lojtarët duhet të rrinë larg fushave.
Sipas “Il Corriere dello Sport”, presidenti i Juventusit e “likuidoi” kolegun e Lazio, Lotito, me një shaka: “Ju mendoni më shumë për renditjen sesa shëndetin e lojtarëve tuaj”. Debati përfundoi aty, por do të mbetet polemikë ende e hapur në ditët në vijim.
