Milot Rashica do të jetë një nga futbollistët që do të mbajë gjallë merkaton e kësaj vere. Futbollisti i Kombëtares së Kosovës, i cili kujtojmë se u “dogj” nga ish-trajneri i Shqipërisë, Xhani De Biazi, tashmë ka hyrë në shënjestrën e shumë prej klubeve më të mëdha jo vetëm në Bundesligë, por edhe atyre europiane.
24-vjeçari, i cili luan prej dy sezonesh e gjysmë me fanellën e Verder Bremenit ndiqet nga Lajpcigu, nga Liverpuli, por së fundmi mësohet se kanë hyrë në skenë edhe nënkampionët e Serisë A në fuqi, Napoli.
Klubi i kaltër sheh te kosovari lojtarin e duhur për të zëvendësuar spanjollin Kajehon, i cili do të largohet në fund të këtij sezoni. Napoli dhe Verderi kanë nisur bisedimet e para, por për momentin nuk bëhen të ditura shifra mbi ofertën.
