Transferimi i vitit. Kështu ishte përcaktuar që në shtator kur iu bashkua PSG-së në huazim falas, me etiketën e bomberit të pamëshirshëm. Koncepti përforcohet akoma më shumë nëntë muaj më pas me huazimin e shndërruar në blerje përfundimtare, por me një skonto prej 20 milionësh (përjashto bonuset). Pra, blerja e Mauro Ikardit u konsiderua një operacion pozitiv nga mediat franceze, unanimë edhe në elozhet për drejtorin sportiv Leonardo.
Ndërkohë, ishkapiteni i Interit po shpreson të rikuperojë numrin 9 (sot i Kavanit) dhe ka siguruar një rritje të rëndësishme të pagës, në 12 milionë euro bruto në sezon: nga 800 mijë euro bruto në muaj, në 1 milion. Prandaj, zyrtarizimi u shty me 24 orë, në ditën e fundit në dispozicion për shlyerjen që ishte fiksuar në 70 milionë euro verën e kaluar. Interi në krahun tjetër u mbrojt me një klauzolë anti-Juve (ose antiSeria A): shumës do i shtoheshin edhe 15 milionë të tjerë nëse gjatë 4 viteve të ardhshme Ikardi do të shitej në Itali.
EFEKTET – Ikardi te PSG mund të jetë lëvizja e parë nga e cila mund të dalin shumë konkluzione mbi ecurinë që pritet të ketë merkatoja botërore e futbollit. Së pari qëndron pikërisht vlera që parisienët shpenzuan për argjentinasin: 17% më pak se 70 milionët e fiksuar 2 shtatorin e kaluar. Një përqindje që mund të konsiderohet si pikënisje për atë që i pret klubet në merkaton e kësaj vere. Pavarësisht se kërkoi ulje, PSG pagoi në çdo rast një shifër jo të vogël, pa iu dridhur duart.
Kjo tregon (e këtu jemi te pika e dytë) forcën e presidentit Al-Khelaifi, në momente kur edhe klube si Reali i Madridit po shikojnë me kujdes lëvizjet e radhës për arsye normalisht ekonomike. Operacioni i Ikardit, së treti, është komplet i pavarur nga largimi i mundshëm i Lautaros: shitja e Mauros e lë Interin në një pozicion të favorshëm në negociatat me Barcelonën, të cilëve zikaltrit u kanë komunikuar se në këtë rast kuota (111 milionët e klauzolës) duhet paguar e plotë: shifër kjo që duket e tepërt në situatën aktuale.
Të mos harrojmë që me Ikardin, PSG tani plotëson edhe “tredhëmbëshin” me Mbapenë e Nejmarin: në këtë rast, Edinson Kavani mund të cilësohet si i tepërt; rrjedhimisht (si pikë e katërt) uruguaiani momentalisht mund të konsiderohet lojtar i lirë (nuk ka firmosur ende rinovimin e kontratës që skadon këtë muaj) dhe mund të përfundojë edhe tek Interi. Së fundmi lëvizja mund të konsiderohet edhe një “bllokadë” kundër Juves: administratori zikaltër Xhuzepe Marota është kujdesur që nëse Ikardi rikthehet në Itali, PSG do duhet të paguajë 15 milionë euro të tjera. Një lëvizje mund të nënkuptojë shumë gjëra.
