Grupi.
Ky është sekreti i Bayern Munich. pas Bundesliga-s dhe Kupës së Gjermanisë, bavarezët duan të fitojnë edhe Champions League, por gjithmonë si grup.
Mesazhi është i qartë dhe ka ardhur nga ylli i gjermanëve: Robert Lewandowski. Sulmuesi ka folur për Sky-in në pritje të çerekfinales së Champions-it kundër Barcelona-s.
Ai ka dashur të lërë mënjanë një rekord personal për të mirën e skuadrës.
Sulmuesi polak mund të vendosë rekordin për numrin më të madh të golave të shënuar në një edicion të vetëm të Champions League që mbahet nga Cristiano Ronaldo, autor i plot 17 golave në edicionin 2013-14.
Megjithatë, Lewandowski ka një objektiv tjetër në mendje.
“Nuk më intereson. Gjëja që ka rëndësi është të luajmë me siguri në sulm dhe të shijojmë lojën si skuadër”, ka thënë futbollisti i Bayern Munich.
“E dinim se kundër Chelsea-t do të duhej të gjenim ritmin e duhur për të bërë atë që dimë të bëjmë më mirë dhe ia kemi dalë. Të njëjtën gjë duhet të bëjë kundër Barcelona-s”.
“E dimë se Barcelona është gjithmonë e rrezikshme. Do të duhet të tregojmë se cilësia jonë si skuadër është superiore se ajo e tyre. Kush do të luajë më mirë, do të shkojë në gjysmëfinale”.