Shënimi “në shitje” është vendosur në pamje të qartë, sepse për të financuar kërkimin e yllit në merkato, Interi është gati të nisë mbledhjen e fondeve. Gjithçka në pak kohë: Merkatoja “post-COVID” do të jetë më e ndërlikuar se zakonisht, kështu që edhe strategë të aftë si administratorit Xhuzepe Marota dhe drejtorit sportiv Piero Auzilio do t’u kërkohet një punë ekstra për të kompletuar rinovimin e skuadrës dhe për t’i garantuar Antonio Kontes një grup konkurrues për titullin.
Megjithatë, për të kompletuar mozaikun, nevojitet “qershia mbi tortë” në mesfushë: Interi duhet të ndryshojë xhirot e motorit për të parakaluar përfundimisht Juventusin. Por për të ëndërruar Kantenë, të preferuarin e trajnerit pas Vidalit (si alternativa janë Ndombele i Totenhemit dhe Tomas i Atletikos së Madridit), hapi i parë janë shitjet. Nevojitet një largim me peshë, si Brozoviç apo Shkriniar, për shembull, ose do të shiten disa.
Po, sepse janë 8 lojtarët nga të cilët Interi po shpreson të arkëtojë: Brozo dhe Shkriniar meritojnë një kapitull më vete, por në listë janë edhe Dalbert, Zhoao Mario, Naingolan, Perisiç, Vesino, Godin, por edhe Eriksen. Të gjithë lojtarë që për momentin nuk duket se kanë të ardhme në projektin e Kontes, përfshi danezin që nuk po ambientohet me skemën dhe kampionatin.
BROZO LAMTUMIRË? – Për misionin “top player”, pra, do të nevojitet një sakrificë e rëndësishme. Rrugët për mesfushorin e ri janë tri: shitja e Brozoviçit mund të jetë hapi i parë për të arritur te Kante, zgjedhja e parë e Kontes, për të cilin Çelsi kërkon së paku 50 milionë euro.
Kroati ka shënuar gabime gjatë kohëve të fundit dhe raporti i tij me ambientin duket më i ftohtë, siç dëshmojnë edhe polemika në rrjetet sociale me një tifoz dhe një “like” sipërfaqësor i lojtarit ndaj sirenave të Bajernit të Mynihut. Brozo ka një klauzolë largimi prej 60 milionë eurosh, por në sajë të krizës ekonomike të gjeneruar nga pandemia, disa shifra mund të ulen e ndoshta një ofertë prej 40 milionësh mund të bindë Interin të lërë të lirë “regjisorin” e dy sezoneve të fundit pa shumë pengje.
SHKËMBIMI PERFEKT – Pengje që është e drejtë të mbahen në konsideratë në rast se do të nevojitet sakrifikimi i Shkriniarit, i cilësuar i rëndësishëm nga stafi teknik dhe drejtuesit, por megjithatë i shitshëm në rast të një oferte të parefuzueshme.
Sllovaku ka shumë admirues përreth Europës dhe nëse Zhoze Murinjo do të vendoste të shndërronte sondazhet në ofertë konkrete, atëherë Interi mund të siguronte maksimumin nga largimi i lojtarit. Maksimumi do të ishte Tangui Ndombele: 23 vjeç, mesfushor, i paguar vetëm një vit më parë 65 milionë euro nga londinezët. Me Interit dhe Totenhemit, megjithatë, duket se ka nisur një lojë shahu: asnjëri nuk bën hapin e parë, pavarësisht se e dinë që një shkëmbim do të lumturonte trajnerët dhe bilancet.
DILEMA “ERIKSEN” – Në dalje është edhe Eriksen, i cili vetëm në dimër u vesh zikaltër. Por me zikaltrit, me përjashtim të disa episodeve, nuk ka arritur të shkëlqejë. Kostoja e danezit ishte 27,5 milionë euro, për ta larguar duhen së paku 50 milionë. Sipas thashethemeve të fundit, madje, përfaqësuesit e lojtarit kanë nisur ta ofrojnë në klube të Premier Ligës.
MARSELO BROZOVIÇ
27 VJEÇ, MESFUSHOR, 50 MILIONË EURO
MILAN SHKRINIAR
25 VJEÇ, MBROJTËS, 50 MILIONË
KRISTIAN ERIKSEN
28 VJEÇ, MESFUSHOR, 50 MILIONË
DALBERT
26 VJEÇ, MBROJTËS I MAJTË, 9 MILIONË
DIEGO GODIN
34 VJEÇ, MBROJTËS, 5 MILIONË
ZHOAO MARIO
27 VJEÇ, MESFUSHOR, 13 MILIONË
RAXHA NAINGOLAN
32 VJEÇ, MESFUSHOR, 15 MILIONË
MATIAS VESINO
29 VJEÇ, MESFUSHOR, 16 MILIONË
IVAN PERISIÇ
31 VJEÇ, SULMUES, 17.5 MILIONË