Blagoja Todorovski mban në ankth Teutën. Pak ditë para përballjes me Granadën, në Durrës nuk janë ende të sigurt nëse do të kenë apo jo nën urdhra mbrojtësin.
Lojtari i linjës së djathtë nuk është stërvitur asnjë ditë gjatë javës së fundit, prej një dëmtimi muskulor në gju. Një lloj shprese ekziston për riaftësimin e tij, pasi maqedonasi të paktën ka nisur të vrapojë.
E megjithatë, Edi Martini po mendon edhe për zëvendësuesin e 34-vjeçarit. Trajneri nuk do që t’ia lërë asgjë rastësisë, ndaj po bën prova me Fabian Beqjen në vendin e tij. Skuadra vazhdon të stërvitet me ritëm të lartë në Shijak dhe stafi teknik po mendon edhe për piketimin e 11-shes. Ka shumë të ngjarë që kundër spanjollëve të debutojë në mesfushë edhe Erando Karabeci.
