U aktivizua plot 5 sezone në Serinë A, me fanellën e Fiorentinës, Parmës, Sienës, teksa arriti të shënonte 19 gola në total me por sulmuesi brazilian Rexhinaldo, nuk arriti të shkonte kurrë në nivelin e pretenduar.
Dhe për këtë “dështim”, 37-vjeçari duket se e ka gjetur fajtoren. Sipas brazilianit ndikim të madh për rënien në karrierën e tij, pati lidhja me Elisabeta Kanalis. Në një prononcim për ItaSportPress, futbollisti i cili aktualisht luan për Katanian në Serinë C, ka rrëfyer historinë e dashurisë me bukuroshen italiane që i dëmtoi karrierën, duke u shprehur:
“U takuam në shtëpinë e Bernardo Korradit me rastin e ditëlindjes së tij. Ajo e dinte kush isha dhe unë e dija se kush ishte dhe pothuajse ramë në dashuri që në atë mbrëmje. Ishte një histori e bukur dashurie, edhe pse zgjati vetëm disa muaj. Ishte Elisabeta ajo që më la dhe nuk e kam problem ta them, sepse ishte gabimi im. Ishin shtatë muaj intensive, që janë pjesë e jetës time, por tani jam i lumtur me gruan time, Rjana.
Jam i kënaqur kur flitet për historinë time me Elisabetën, edhe pse shpesh më kujtojnë thjesht si hamshorin e saj dhe jo si një futbollist me pothuajse 500 ndeshje në Itali. Ajo histori, me një grua të famshme, më hoqi diçka, sepse shumë drejtorë sportivë më konsideronin një futbollist që mendoja vetëm për gratë dhe jetën dëfryese.
Nuk mohoj asgjë, por vërtet besoj se historia e dashurisë me Kanalis dëmtoi karrierën time, edhe nëse më vonë provova, duke shënuar gola, se nuk isha thjesht lojtar i një klubi nate.
Nuk komunikoj më me Elisabetën, ajo jeton në Shtetet e Bashkuara dhe unë në Itali, por nuk e hedh poshtë atë aventurë, kanë qenë shtatë muaj të mirë”, u shpreh Rexhinaldo.
