Herri Kejn dhe një numër lojtarësh të rëndësishëm të Anglisë kanë mbajtur një takim të skuadrës në qendrën stërvitore të kombëtares “St George’s Park” për të diskutuar rëndësinë e disiplinës pas një sërë shkeljesh që futbollistët e “Tre Luanëve” kanë bërë këto kohët e fundit.
Temi Abraham, Xhejdën Sanço dhe Ben Çiluell vazhdojnë të mungojnë në grumbullimin e skuadrës pasi thyen rregullat e sigurisë “anti-COVID”, duke qenë të pranishëm në një festë në apartamentin e sulmuesit të Çelsit mbrëmjen e së shtunës.
Një incident i tillë erdhi pasi Mejson Grinud dhe Fill Foden u dërguan në shtëpi nga Islanda, sepse thyen rregullat e karantinës në hotel, duke ftuar dy vajza vendëse me të cilat kaluan natën. Trajneri Garet Sauthgejt është tërbuar nga sjellja e papërgjegjshme e futbollistëve të tij dhe e ka mirëpritur takimin e drejtuar nga kapiteni Herri Kejn të hënën, i cili u tërhoqi veshin shokëve të skuadrës që të tregohen më të përgjegjshëm në të ardhmen.
Sauthgejt e ka nënvizuar gjithnjë rëndësinë e disiplinës për lojtarët e tij, të cilët duhet të kenë role model dhe ka thënë se pret nga ata që të japin një shembull në këtë periudhë pandemie që e ka vendosur vendin në një pozicion shumë të vështirë. Anglia do të zbresë sot në fushë në miqësoren kundër komshinjve të Uellsit në “Wembley” në orën 21:00. Gjithnjë në “Wembley”, “Tre Luanët” do të luajnë në Ligën e Kombeve kundër Belgjikës të dielën dhe Danimarkës të martën.
