Dy vite më parë, në një video prezantimi të publikuar në rrjetet sociale, Interi shpjegoi në mënyrë të qartë se çfarë priste nga blerja e Stefan de Vraj. Mbrojtësi holandez ndoqi lojën, duke u “armatosur” me kovë me çimento dhe mistri, i vendosur për të ngritur një mur në prapavijë. Ideja e Luçiano Spaletit ishte pikërisht ajo, të ngrinte një ditë në mbrojtje të Handanoviçit, duke vendosur holadezin përkrah Milan Shkriniarit. Afrimi i Antonio Kontes në stolin zikaltër ka ndryshuar disi planet: Shkriniar për një pjesë të madhe mbetet mes mbrojtësve më të mirë në botë në një linjë mbrojtjeje me 4, ndërsa në atë me 3 (pas një viti eksperience) ende nuk ka arritur të jetë i pakalueshëm.
Në “Appiano Gentile” janë rikthyer pankartat “këtu punohet” për repartin e mbrojtjes si pasojë e një tjetër qëndrimi taktik: përfshirja e fantazistit në mesfushë së bashku me dy anësorë ultra-sulmues ka krijuar disbalancë. “COVID”, dëmtimet dhe rrotacioni i detyruar për shkak të tri ndeshjeve në javë ka bërë pjesën tjetër. Morali: Interi ka zbritur në fushë me shtatë “mbrojtje” të ndryshme në nëntë ndeshjet e para të sezonit dhe vetëm kundër Milanit dhe Borusia Mynshengladbah ka aktivizuar tre lojtarë të njëjtë për dy ndeshje radhazi.
SHUMË DHURATA – Fakti i mungesës së titullarëve fiks, shpesh është një resurs i rëndësishëm, megjithatë promovimi i vazhdueshëm i elementëve në mbrojtje rrezikon të krijojë konfuzion mes interpretuesve, të cilët çdo tri ditë kanë nevojë të gjejnë pika të reja referimi në fushë. Konte nënvizoi që nga fillimi i sezonit që do të ishte dashur pak kohë për të gjetur ekuilibra të rinj, duke konsideruar pamundësinë e provave dhe eksperimenteve gjatë fazës përgatitore. Dhe, për fatin e tij të keq, ka qenë një profet i mirë: 10 gola të pësuar në kampionat në 6 ndeshjet e para, kundër 2 të sezonit të kaluar. Edhe në Champions raporti është negativ, me Handanoviçin e kaluan pesë herë në tri ndeshje kundër 3 golave të një viti më parë. Dakord, rendimenti negative nuk mund t’i akordohet vetëm mbrojtësve, por është e qartë që e gjithë faza mbrojtëse ka disa mangësi përgjatë ndeshjes.
SHKRINIAR KËRKON SHANS – Interi ka nevojë të gjejë kompaktësi, por mbi të gjitha të ngrejë murin. Dhe tani ka një arsye më shumë për të përshpejtuar procesin e mbrojtjes së fortesës. Në Madrid sllovaku u rikthye të nuhasë parfumin e fushës, duke u ulur në stol pas një muaji mungese në fushat e lojës. Koronavirusin e ka lënë pas shpine, tani ka dëshirë të rimarrë Interin në shpatulla dhe të rifitojë kohën e humbur. Një provë e mirë kundër Atalantës (ku Gjimshiti pritet të luajë nga minuta e parë) nesër mund të jetë një pikënisje e mirë për të përmbajtur forcën e sulmit të bergamaskëve. Përkrah parashikohet të ketë De Vrajin dhe Bastonin.
