Trajneri i Mançester Junajtid Ole Gunar Solskjaer është revoltuar edhe pse ekipi i tij fitoi sot në kampionat ndaj Evertonit me rezultatin 1-3.
Për “BT Sport”, tekniku norvegjez akuzoi Premier Ligën për përcaktimin e axhendës së ndeshjeve me qëllim që “Djajtë e Kuq” sot të dështonin. Referuar ngarkesës së madhe të takimeve brenda një kohe të shkurtër, Solskjaer u ankua për faktin se ekipi nuk u relaksua mjaftueshëm pas ndeshjes së fundit në Ligën e Kampioneve ndaj Bashakshehirit ditën e mërkurë, ndërsa sot u detyrua të luante në drekë.
“Kishin planifikuar që ne të humbisnim. Sot e kishim Luk Shoun të dëmtuar pas kthimit nga Turqia. Dua t’ju flas për orarin e ndeshjes, donin që djemtë e mi të dështonin. Të mërkurën në mbrëmje luajtëm, të enjten u kthyem dhe sot luajmë në drekë të shtunën?! Këta djem meritojnë të trajtohen më mirë sesa të flaken këtu e të dështojnë”, u shpreh trajneri i Mançester Junajtid Ole Gunar Solskjaer.
