Ish-futbollisti francez, Patrik Evra, shquhet për ngacmimet e tij pikante, që në shumicën e rasteve përfundojnë në rrjetet sociale duke bërë xhiron e internetit.
Në “grackën” e Evrasë së fundmi ka “rënë” ish-shoku i tij te Juventusi, Arturo Vidal, i cili aktualisht është pjesë e Interit. Francezi ka postuar së fundmi një foto në rrjetin social “Instagram”, kur ai ishte pjesë e bardhezinjve, duke ngacmuar mikun e tij Vidal.
Në foto e publikuar Evra ia ka mbuluar fytyrën me një “emoji”, kilianit. Francezi nuk mjaftohet me kaq, pasi gjithçka e ka shoqëruar me një dialog mes tij dhe Pirlos, ku në shënjestër është pikërisht futbollisti i skuadrës zikaltër.
“Pat, kush është ai pas teje?”, janë fjalët e Pirlos në dialogu e improvizuar, ndërkohë që merr edhe përgjigjen. “Nëse nuk e kam humbur kujtesën, ky djalë ka luajtur me ne më parë”.
Evra nuk është mjaftuar me këtë foto pikante, teksa ka vendosur edhe një postim të tijin: “Fitorja nuk është e rëndësishme, është e vetmja gjë që llogaritet. Por të jesh juventin deri në fund është e vetmja gjë që vlen gjithashtu (Më vjen keq Vidal)”, shkruan francezi në postimin e bërë në “Instagram”.
