Për vite me radhë ka qenë simboli i Interit. Një flamur. Një lider brenda dhe jashtë fushës. Ai ishte një mbrojtës, edhe sot luan në mbrojtje të ish-ekipit të tij. Ose më saktë, si një komentator televiziv, gjithmonë analizon atë që sheh me një ekuilibër të madh, duke sjellë mendimet e tij pa frikë nga kontradikta. Beppe Bergomi është njohur gjithnjë për ndershmëri dhe profesionalizëm.
Dhe në ditët e fundit, ai ka qenë zëri jokonvencional zikaltër: “Interi nuk është i detyruar të fitojë”. Argumenti për tezën e tij qëndron: “Unë besoj se ky është një kampionat shumë i ekuilibruar. Në fund, kushdo që është në gjendje të ketë durim dhe ekuilibër do të fitojë. E shihni, rruga është e gjatë, sezoni është i veçantë dhe pengesat nga java në javë janë aty.
Duhet të jesh i mirë për të mos u emocionuar shumë kur fiton ose bie në depresion pas një disfate. Unë e kuptoj që Interi, pas vendit të dytë në sezonin e kaluar, mund të përmirësohet vetëm duke fituar, por në futboll asgjë nuk merret si e mirëqenë. Kritikat ndaj Conte janë të rënda, nëse humbasin të tjerët bën më pak bujë. Kjo nuk është e drejtë”.
Jo vetëm Sampdoria-Inter: gjatë këtij sezoni, zikaltrit kanë bërë disa gabime individuale në mbrojtje, të cilat kushtojnë shumë pikë. Bergomi shton: “Kur analizojmë dhe gjykojmë, duhet ta bëjmë atë në mënyrën e duhur dhe të ekuilibruar. Unë nuk e shoh skuadrën e Interit më mirë se të tjerat. Pastaj, është e qartë se duhet të bëjë gjithçka që të fitojë. Dhe unë jam i sigurt se Interi do të qëndrojnë në luftën për titullin deri në fund. Nuk mund të pajtohem me ata që e konsiderojnë Interin si favorit. Gjithashtu besoj se në planin afatgjatë, ky presion, nga media dhe tifozët, rrezikon të krijojë pritshmëri shumë të mëdha; gjithashtu të gjenerojë presion të mëtejshëm në ekip”.
Pra, kush është favoriti për titullin? Ish-kapiteni zikaltër përgjigjet: “Unë gjithmonë e shoh Juven përpara të gjithëve, për cilësinë dhe plotësinë e skuadrës. Pastaj Interi, Milani dhe Napoli mund të luajnë letrat e tyre. Gjithashtu, Atalanta dhe Roma nuk janë sigurisht shumë larg. Sa i takon Interit, largimi nga Champions krijoi mendimin se, meqenëse bëri investime dhe ka një trajner fitues, tani duhet të triumfojë në Serie A. Por, nuk është kështu”.
Duke folur për trajnerin, ai gjithmonë e ka mbrojtur Conte: “Sigurisht, puna e Antonio nuk mund të vihet në pikëpyetje, sepse rritja e ekipit është nën sytë e të gjithëve. Jam i bindur që Conte është vlera e shtuar e Interit. Historia e thotë qartë: ai gjithmonë ka fituar. Conte është pikërisht njeriu që i duhej Interit për t’u rikthyer në majë”.
Por, kur Lukaku mungon, vuajtja e ekipit është e qartë. Bergomi jep shpjegimin e tij: “Çdo skuadër ka pikën e vet të referencës. Ju e dini se cili bëri gjithçka për ta sjellë Romelu në Milano. Tashmë, për këtë intuitë i duhet thënë gjithmonë faleminderit Contes. Lukaku është dominues, ai bën ndryshimin dhe transformon ekipin. Kjo është një pikë tjetër themelore në garën e titullit.
Fituesi do të jetë ai që mund të kompensojë më mirë mungesat e lojtarëve të mëdhenj. Milani pa Ibra ka treguar se ka një identitet të saktë dhe fitues. Juve pa Ronaldon humbi pikë me Crotone dhe Benevento, Napoli pa Mertens dhe Osimhen prodhojnë shumë, por realizojnë pak. Dhe kështu, Interi pa Lukaku vihet në vështirësi. Do të ketë ekuilibër deri në fund, do të shohim kush do të bëjë më pak gabime”.
