Zhoze Murinjo është një njeri dhe trajner i drejtpërdrejtë. Dhe këtë lojtarët e dinë. Kur vjen në një klub, portugezi bën vlerësimet e tij për karakteret që ka përballë. Kush e ndjek, do të jetë gjithnjë në zemrën e tij, edhe pse mund të mos jetë më i talentuari në ekip. Por, kush nuk është shumë i përfshirë, i tregohet dera.
Kur Mou vendos që një lojtar është jashtë projektit, shanset për t’ia ndryshuar mendjen janë të pakta. Rasti i fundit është ai i Ljuk Shout, mbrojtësit të majtë të Mançester Junajtidit. Në 2014-ën, “Djajtë” paguan 30 milionë sterlina për ta transferuar nga Sauthemptoni. Por, karriera e tij në “Old Trafford” nisi e vështirë, mbi të gjitha në sezonet kur drejtoi portugezi. Duke folur për Geri Linekerin, Shou shpjegon:
“Ishte e vështirë, sepse nuk arrija që të nxirrja pikëpamjen time dhe njerëzit dëgjonin vetëm një nga dy opinionet. Në atë kohë e dija që do të ishte më mirë të heshtja. Shumë njerëz më jepnin të drejtë mua, kështu që e dija që kisha një mbështetje, por duhet të përmirësohesha dhe isha modest. Pata shumë vështirësi, por dola më i fortë”.
Dhe këtë e tregon koha, tani që me Solskjaerin ai është rikthyer titullar: “Aftësia e tij për të menaxhuar njerëzit është e jashtëzakonshme. Ai di atë që duhet bërë për të nxjerrë më të mirën. Të bën të ndihesh mirë një dorë mbi shpatull. Besimi që më ka dhënë më shtyu në një tjetër nivel”.