Këtë verë klubi i Real Madridit do të mbajë zgjedhjet për presidentin e ri, pas 3 mandateve të njëpasnjëshme të fituara nga presidenti aktual, Fiorentino Perez.
Në tre zgjedhjet e mëparshme, Perez nuk ka pasur kandidat, por këto zgjedhje do të jenë të luftuara, teksa një 32-vjeçar ka hedhur kandidaturën për tu bërë presidenti i ri i Real Madridit.
Enrike Rikelme quhet kandidati i ri, i cili është një biznesmen i suksesshëm në fushën e energjisë rinovuese në Amerikën Latine, me kompaninë e tij që vlerësohet 300 milionë dollarë.
Për të kandiduar për president duhen disa kushte , të kesh të paktën 20 vite anëtar i klubit të Realit, kusht ky që Rikuelme e plotëson pasi është anëtar i klubit që prej moshës 12 vjeç dhe duhet të kesh kapital 15% të buxhetit të klubit që shkon deri në 90 milion euro që nuk është aspak pengesë për kandidimin e 32-vjeçarit.
‘’Tani për tani klubi duhet të marrë një drejtim tjetër dhe të përmirësojë menaxhimin e tij, duke u bërë një klub global. Nuk të bën global një turne veror në Amerikë.
Unë shoh mundësinë e zbatimit të përvojave që kam fituar dhe menaxhimin e një bordi profesional dhe jo të përbërë nga miq, në mënyre që ta çojmë klubin në një nivel tjetër’’, u shpreh biznesmeni ambicioz.
