Milan Skriniar, një nga shtyllat e Inter-it kampion i Italisë, nuk e ka fshehur befasinë për epilogun e çështjes së trajnerit në shtëpin zikaltër.
“Lamtumira e Conte-s i ka befasuar të gjithë, e kam mësuar nga mediat. Nuk di asgjë tjetër, unë vetë dua ta di se çfarë do të ndodhë në të ardhmen”.
Gjithsesi, mbrojtësi ka siguruar tifozët: “Dua të qëndroj tek Inter-i dhe të mbroj titullin e fituar, e kam thën ë kohë më parë. Nuk i kam marrë kurrë seriozisht zërat për një largim timin”.
Skriniar ka ripërshkuar edhe etapat e titullit:
“Ka qenë një udhëtim i bukur dhe i gjatë, mbaj mend festimet me tifozët para San Siro-s në ndeshjen e fundit të kampionatit. Kam përfituar për të valëvitur flamurin e Sllovakisë, jam krenar edhe për këtë, që kam sjellë titullin italian në vendin tim”, ka thënë Skriniar nga grumbullimi me Sllovakinë për Sport Aktuality.
