Lëvizje surpriz në merkato, Mario Gjata përfundon te Dinamo, duke iu bashkuar kështu dyshës Harizaj-Mihana.
Blutë e Bledi Shkëmbit, kanë arritur të mposhtin konkurrencën e Partizanit, duke arritur akordin me sulmuesin fierak, i cili është pjesë edhe e Kombëtares Shpresa.
Gjata dhe pse ishte shumë pranë firmës me Partizanin ka zgjedhur anën tjetër të kryeqytetit, teksa do të veshë fanellën e Dinamos.
Marrëveshja zyrtare mes Dinamos dhe Apolonisë është arritur dhe tashmë pritet vetëm firma e Gjatës dhe prezantimi i tij.
Vlen të theksohet se sulmuesi 21-vjeçar spikati në sezonin e fundit të Kategorisë Superiore teksa në 35 ndeshje me fierakët arriti të realizonte 8 gola.
