Këto janë ditë ankthi në Brazil për gjendjen e legjendës braziliane Pele, i cili ndodhet i shtruar në spitalin “Albert Einstein” në Sao Paulo, që nga 31 gushti, ku u operua për të hequr një tumor.
Sipas TV Globo, “O Rei” është akoma i shtruar në kujdes intensiv dhe për këtë arsye ende nuk është transferuar në një dhomë të vetme dhe nuk dihet nëse tumori është beninj apo malinj. Kontrolli i fundit mjekësor daton të hënën.
Legjenda e futbollit botëror, tashmë 80-vjeç u diagnostikua me kancer në zorrën e trashë. Ekipi mjekësor vendosi menjëherë për shtrimin në spital, më 31 gusht.
Sipas asaj që u komunikua nga institucioni mjekësor brazilian, “tumori u zbulua gjatë testeve rutinore kardiovaskulare dhe laboratorike dhe materiali u dërgua në laborator për analiza histologjike”. Të shtunën e kaluar u krye operacioni, teksa pritet me mjaft ankth të mësohet se cila është gjendja e Pele.
