Nuk kanë fund telashet për ish-arbitrin italian, Davide Pekoreli, i cili bëri bujë të madhe së fundmi, teksa u zhduk në Shqipëri në janar, për t’u shfaqur para pak kohësh, pranë ishullit të Montekristos në Itali.
Sipas mediave italiane, ndaj biznesmenit ka nisur një hetim pasi dyshohet se ka vjedhur një sasi monedhash ari nga një kishë në Sovana.
Sipas “La Nazione” 45-vjeçari, i cili në të kaluarën ka qenë arbitër në Serinë C italiane, ka marrë një sasi monedhash ari me një vlerë prej rreth 400 mijë euro.
Prokuroria ka nisur hetimet për vjedhje dhe ka bërë disa sekuestrime. Pekorelli gjithashtu po hetohet edhe nga prokuroria e Pukës në Shqipëri për zjarrvënie dhe vjedhje eshtrash njerëzore.
I pyetur nga mediat italiane për këto hetime, ish-arbitri deklaroi: “Jam i qetë, besoj te prokuroria. Siç kam deklaruar edhe më parë, kam gjetur dy arka me monedha ari në ishullin e Montekristos, por nuk i kam marrë kurrë në pronësi”.