Vllaznia është kthyer si skuadër shtëpie, pasi në këtë sezon kuqeblutë po hasin një ngërç të madh në transferta. Shkodranët e nisën mirë kampionatin, ku pikërisht fituan 5-3 në shtëpinë e Laçit.
Por që nga ky sukses i 11 shtatorit dhe deri pas ndeshjes së javës së shkuar me Dinamon, të besuarit e trajnerit Tomas Brdariç nuk e njohin trepikëshin jashtë “Loro Boriçit”.
Për të fituar në transfertë, shkodranët duket se e kanë të vështirë, por edhe për të humbur po ashtu. Në 7 ndeshjet e deritanishme që kanë luajtur në kampionat jashtë fushe, kuqeblutë kanë vetëm një humbje, atë ndaj Kukësit me shifrat 2-0, ndërkohë që në 5 ndeshje kanë barazuar.
Ndërsa fitorja e vetme është ajo në premierën e sezonit në stadiumin e Laçit, një ndeshje që prodhoi festival golash. Ngërçi i transfertave kërkon studim dhe riparim nga ekipi dhe stafi teknik, pasi një ekip që pretendon të dalë kampion, nuk mund t’ia dalë vetëm me fitoret në shtëpi.
Pra, Vllaznia e ka detyrim që të ndryshojë në këtë drejtim, pasi ka mbi tre muaj që nuk e njeh fitoren në transfertë. Gjithsesi, ky obligim mbetet për vitin 2022, pasi për 2021- shin u ka mbetur vetëm ndeshja e fundit në shtëpi me Kukësin.
Në fazën e parë shkodranët janë mundur 2-0 nga verilindorët, takim i cili u luajt në stadiumin e Rrogozhinës.
