Katër lojtarë të kombëtares argjentinase janë pezulluar me dy ndeshje për ndërprerjen e kualifikueses së Botërorit kundër Brazilit në shtator.
Dy lojtarët e Aston Vilës, Emiliano Buendia dhe Emiliano Martinez, bashkë me ata të Totenhemit në atë kohë, Lo Selso dhe Romero, u dënuan nga Komiteti Disiplinor i FIFAs për shkeljen e protokolleve të sigurisë.
Ndeshja e 5 shtatorit u shty pasi autoritetet braziliane të shëndetësisë mësynë në fushën e Sao Paulos duke këmbëngulur se katër lojtarët argjentinas kishin shkelur protokollin e COVID-it, duke i akuzuar ata se kishin falsifikuar formularin e karantinës dhe nuk mund të ishin në fushë.
FIFA vendosi riluajtjen e ndeshjes dhe i gjobiti edhe të dyja federatat.
