Eliminimi nga Conference League ka mbyllur vetëm kapitullin europian të Elbasanit.
Brenda klubit nuk ka kohë për të qëndruar te zhgënjimi i penalltive, pasi fokusi është zhvendosur menjëherë te ndërtimi i skuadrës për sezonin e ri në Superiore. Drejtuesit verdheblu kanë hyrë në fazën përfundimtare të merkatos dhe synimi është që grupi të kompletohet përpara nisjes së kampionatit. Burime pranë klubit bëjnë me dije se puna për afrimet nuk ka përfunduar dhe se në ditët në vijim priten lëvizje të tjera.
MERKATO – Pavarësisht afrimeve të bëra deri tani, drejtuesit mendojnë se organika ka ende nevojë për ndërhyrje. Prioritet mbetet mesfusha, ku kërkohen dy futbollistë me karakteristika të ndryshme. Njëri pritet të jetë një organizator loje, ndërsa tjetri një mesfushor me tipare më mbrojtëse, që të rrisë konkurrencën në qendër të fushës. Largimet e kësaj vere kanë bërë që klubi të mos ndalet me afrimet, ndërsa objektivi është krijimi i një grupi me alternativa në çdo repart.
MBROJTJA – Përveç mesfushës, edhe prapavija mbetet një repart ku priten përforcime. Burimet e “Panorama Sport” bëjnë me dije se Elbasani kërkon edhe dy mbrojtës, një në qendër dhe një futbollist që mund të aktivizohet në krah. Edhe pse Joan Epitauks ka dhënë sinjale pozitive në ndeshjet europiane, drejtuesit duan të shtojnë konkurrencën në repartin defensiv, duke qenë se sezoni do të jetë i gjatë dhe me shumë ndeshje. Ideja është që trajneri Ivan Gvozdenoviç të ketë sa më shumë alternativa, në mënyrë që të ruhet niveli i skuadrës gjatë gjithë kampionatit.
OBJEKTIVI – Në Elbasan nuk e konsiderojnë eliminimin nga BATE si një arsye për të ndryshuar planet. Përkundrazi, paraqitja në Europë i ka bindur drejtuesit se skuadra është në rrugën e duhur dhe se me disa ndërhyrje të tjera mund të jetë edhe më konkurruese. Kjo është arsyeja pse merkatoja do të vijojë deri në ditët e fundit, me klubin që po monitoron disa profi le, kryesisht futbollistë të huaj, por pa përjashtuar edhe emra nga kampionati shqiptar.
GVOZDENOVIÇ – Edhe trajneri serb pritet të ketë një rol të rëndësishëm në zgjedhjen e afrimeve. Pas dy ndeshjeve me BATE Borisov, ai ka një panoramë më të qartë të grupit dhe të pikave ku skuadra ka nevojë për përmirësim. Stafi teknik ka dorëzuar kërkesat e tij te drejtuesit dhe puna po bëhet në koordinim, me synimin që lojtarët e rinj të bashkohen sa më shpejt me ekipin dhe të kenë kohë të përshtaten përpara startit të Superiores.
SUPERIORJA – Europa tashmë është lënë pas dhe në kampin verdheblu fokusi është i gjithi te kampionati. Pas sezonit të kaluar, ku Elbasani ishte një nga surprizat më të bukura të Superiores, pritshmëritë janë rritur ndjeshëm. Brenda klubit ekziston bindja se me katër afrime të tjera, dy në mesfushë dhe dy në mbrojtje, skuadra do të jetë edhe më e fortë se ajo që u prezantua në Conference League. Objektivi mbetet ndërtimi i një ekipi që jo vetëm të luftojë për zonën europiane, por të jetë sërish mes pretendentëve për vendet e para në kampionat.
