Kroacia dhe Anglia që do të përballen pas pak çastesh në stadiumin “Luzhniki”, janë dy ekipe që kanë befasuar duke arritur deri këtu. Në fillim të kompeticionit askush nuk i kishte në laps, megjithatë në këtë moment një prej tyre do të shkojë në finale me shpresën për të fituar trofeun e madh.
Kjo është hera e dytë për Kroacinë që mbërrin në gjysmëfinale pas 20 vitesh, ndërsa Anglia, që e ka fituar trofeun në vitin e largët 1966, kërkon të rikthehet te suksesi i munguar prej dekadash. Pritet një ndeshje tepër e luftuar dhe trajnerët nuk kanë bërë ndryshime të mëdha në formacion. Zlatko Dalic, është një trajner i panjohur në gjysmëfinale në Kupën e Botës, por ekipi i tij ka bërë rrugën e duhur dhe ndaj Anglisë synon fitoren për të arritur në finalen e Moskës.
Edhe në krahun tejtër ka shumë besim dhe optimizëm te puna e bërë nga Gareth Southgate. Në fushë pritet një ndeshje e fortë dhe diferencat janë tepër të vogla. Kroacia mburret me mesfushën, pasi ka një nga repartet më të kompletuara në këtë Botëror, ndërsa Anglia me freskinë dhe shpejtësinë.
