Trajneri i Barcelonës, Ernesto Valverde, foli në dhomën e shtypit të “AT & T Stadium”, në Arlington, pas disfatës së parë të parasezonit të Barçës, kundër Romës, me rezultatin 2-4. Kjo është pamja e tij mbi ndeshjen.
A mendoni se humbja shërben për të analizuar shumë gjëra? Lajmi më i mirë është se ka shënuar Malcom…
Mendoj se luajtëm një lojë të mirë, përveç çerekorëshit të fundit. Për 75 minuta kemi dominuar ndeshjen në mënyrën e dëshiruar, por edhe kemi kërkuar që lojtarët të kenë më shumë minuta. Ka pasur minuta, në të cilat e kemi dominuar ndeshjen dhe kemi qenë në gjendje ta dërgojmë rezultatin në 3-1. Roma, me një ekip më të plotë, na ka shtrënguar. Ne kishim një ekip shumë të ri në fushë, ndërsa italianët u paraqitën me një ekip më veteran. Por, unë jam i lumtur me paraqitjen. Ne të gjithë dëshirojmë të fitojmë, por mendoj se kemi bërë një ndeshje të mirë.
A pritnit që Malcom do të përshtatej kaq shpejt?
Ai është një lojtar që lidhet mirë me lojën. Eshtë një lojtar i fortë, që mund të japë shumë “mes rreshtave”. Ka një goditje potente. Jemi të lumtur që kjo përshtatje ndodhi shpejt.
Rafinha ka luajtur dy ndeshje të mira. A mund t’i jepni atij minutat që dëshiron në sezonin e ri?
E kam parë shumë mirë në të dyja ndeshjet. Ai ka një qëndrim të madh ndaj lojës, luan në disa pozicione dhe në rastin tim është hera e parë që mund ta shoh Rafinha me këtë diferencë, sepse u dëmtua vitin e kaluar. Është hera e parë që kam parë atë të luajë më shumë kohë dhe në trajnim. Dhe jam i kënaqur, sepse ai është duke luajtur mirë dhe po tregon përfshirje të madhe.
A ishte nënshkrimi i Malcom në planet tuaja, apo një surprizë e klubit?
Klubi punon që të ketë lojtarë të mirë dhe kjo është ajo që po bëjmë. Unë jam pjesë e klubit, si trajner. Por, ka njerëz të tjerë, që janë të përkushtuar për të ndjekur lojtarët dhe Malcom ishte një mundësi. Ne jemi të kënaqur me të, sepse shohim se ka shumë mundësi.