Paris Saint-Germain i Thomas Tuchel ka hyrë në historinë e klubit duke fituar për herë të parë tri transfertat e para të kampionatit francez. Kampionët në fuqi të Francës e kanë realizuar këtë arritje në ndeshjen e fituar në fushën e Rennes, e mundur me rezultatin 1-3.
Dhe të mendosh se ndeshja nuk ka filluar aspak mirë për miqtë, të cilët e kanë parë vete në disavantazh në minutën e 11-të të takimit pas një autogoli të Rabiot.
Avantazhi i vendasve ka zgjatur deri në minutën e 45-të të pjesës së parë, me Di Maria që ka kthyer ekuilbrat me një gol të bukur nga jashtë zonës së rreptësisë.
Përmbysja është kompletuar në minutën e 61-të, teksa autori i golit ka qenë mbrojtësi Meunier, i cili ka shfrytëzuar në mënyrën e duhur pasimin e zgjuar të marrë nga Neymar. Shtatë minuta para fundit ka ardhur edhe goli i tretë i “Les Parisiens”, që kanë shënuar me Choupo-Moting, pesë minuta pas futjes në fushën e lojës.
PSG kryeson Ligue 1 me 18 pikë pas gjashtë fitoreve të marra në gjashtë javët e para të kampionatit, pesë pikë më shumë se ndjekësja më e afërt, Lille. Rennes, nga ana tjetër, ka zbritur në vendin e 13-të të renditjes, tri larg zonës së rënies nga kategoria.