Alban Hoxha është shtylla e Partizanit dhe idhulli i shumë tifozëve të kuq. Por, “gardiani” 30-vjeçar është shpërblyer më së miri për paraqitjet e bëra deri më tani në kampionat dhe triumfin në derbin e kryeqytetit, ku arriti bashkë me repartin e mbrojtjes të ruanin portën të paprekur.
Tekniku Christian Panucci e ka thirrur për dy ndeshjet e Kombëtares ndaj Jordanisë (miqësore) në 10 tetor dhe ndaj Izraelit në 14 tetor për Ligën e Kombeve.
Gardiani i Partizanit numëron 3 ndeshje me Shqipërinë. Momenti i tij më i mirë ishte pritja e penalltisë ndaj Izraelit 2 vite më parë në kualifikueset e Kupës së Botës 2018, por me 9 veta në fushë, Hoxha ishte i pafuqishëm të shpëtonte Shqipërinë nga dy golat e tjerë.
