Tyson Fury ka thumbuar rivalin e tij të 1 dhjetorit, Deontay Wilder, duke thënë se ai maskotat nuk i godet me grusht, siç bëri boksieri amerikan, por i gjuan me shkelm te ko***. Kjo deklaratë është dhënë nga boksieri britanik gjatë një interviste televizive, ku një maskotë e veshur si ari i ka ardhur fshehurazi nga pas në momentin që ai po fliste para gazetarit. Fury fillimisht u tremb dhe më pas qeshi, duke i gjuajtur me shkelm maskotës.
“Kujtova se erdhi ndonjë qen i tërbuar dhe u tremba. Kush e di se si do të ketë dalë fytyra ime”, u shpreh duke qeshur Fury, që nuk e priste këtë shaka gjatë kohës që po fliste me gazetarin. Intervista është bërë në kampin ku boksieri britanik po përgatitet për duelin 1 dhjetorit, ku në “Staples Center” të Los Anxhelosit do të përballet me Wilder.
Kjo ndërhyrje e maskotës ishte planifikuar që më parë nga gazetari i BT Sport, situatë që krijoi mjaft të qeshura. “Ti je i çmendur. Do ta shoh më pas reagimin tim në kamera”, shprehet Fury duke qeshur. Boksieri britanik, 27 fitore e asnjë humbje në karrierën e tij, duket në humor të mirë në prag të kësaj sfide me Wilder, ku synon titullin kampion bote të peshës së rëndë në kategorinë WBC.
