Pas katër muajsh, Real Madrid është rikthyer në gjueti. Në kërkim të një trajneri të ri, sikurse bëri në fund të majit, pas dorëheqjes së papritur të Zinedine Zidane dhe e përfunduar dy ditë para fillimit të Kupës së Botës në Rusi, me emërimin e ish-trajnerit të përfaqësueses së Spanjës, Julen Lopetegui. Tashmë gjuetia rifillon pas shkarkimit të teknikut që në krye të Los Blancos mbijetoi për vetëm dy muaj e gjysmë, mbushur me makthe për shkak të ecurisë negative të kampionëve në fuqi të Europës. Por njëlloj si mëparë, presidenti i Real Madrid, Florentino Perez duket i vendosur që të sigurojë shërbimet e një trajneri të angazhuar, edhe për shkak se një prej të paktëve të lirë në treg, Antonio Conte, ka refuzuar ftesën, pasi mësoi se nuk është i dëshiruar nga kontigjenti në dhomat e zhveshjes.
Kështu, me të përfunduar komandimi i Santiago Solari, ideja është që të synohet një veteran spanjoll, sikurse është Roberto Martinez, aktualisht trajner i përfaqësueses së Belgjikës, që nën drejtimin e ish-trajnerit të Wigan dhe Everton ka fluturuar në vendin e parë të klasifikimit të FIFA-s, pasi e mbylli Botërorin në vendin e tertë, renditja më e mirë në historinë e “Djajve të Kuq”. Fatkeqësi që Martinez është nën kontratë deri në 2020… sikurse ishte nën kontratë edhe Lopetegui me federatën spanjolle, e madje edhe Mauricio Pochettino te Tottenham, i kontaktuar në fillim të sezonit.
Por Perez nuk dorëzohet dhe shënjestron gjithmonë objektivat e vështirë. Lajmi është që nga Belgjika nuk ka mbërritur një mbyllje, por në të vërtetë një paralajmërim…: “Klauzolë për t’u larguar? Nuk flasim publikisht për çësthje që lidhen me marrëdhëniet e punës me bashkëpunëtorët tanë, por nëse Real Madrid do të ishte i interesuar duhet më parë të gjejë një marrëveshje me ne”, deklaroi Stefan Van Loock, zëdhënësi i federatës belge, për agjencinë “EFE”.