VAR do të përfshihet në Champions League nga sezoni i ardhshëm, por në Nyon po mendojnë të përshpejtojnë kohët. Sipas “BBC”, UEFA po mendon ta përdorë teknologjinë që në fazën me eliminim direkt të këtij edicioni.
Penalltia e bujshme që i është dhënë Sterling në ndeshjen e luajtur mes Manchester City-t dhe Shakhtar-it ka shtuar frikën e përsëritjes së gabimeve të rënda në fazat vendimtare të kompeticionit.
Prej muajsh po zhvillohen stërvitje për përgatitjen e arbitrave nga e gjithë Europa në lidhje me VAR-in dhe në Nyon po rritet besimi mbi faktin se kanë në dispozicion numrin e duhur të gjyqtarëve për ta përdorur teknologjinë në muajt e ardhshëm.
Vendimi mund të merret në mbledhjen që Komiteti Ekzekutiv i UEFA-s do të zhvillojë në fillimin e muajit dhjetor.
