Tri goditje për të ndezur ëndrrat e tifozëve, tri blerje të nivelit të lartë për të përforcuar skuadrën, për t’i dhënë tifozëve të Inter kartëvizitën e tij dhe për të nisur menjëherë aventurën e re.
Dy blerje në qershor dhe një në janar, nëse është e mundur, me synimin për të ngushtuar diferencat me Juventus-in “e tij”. Beppe Marotta kërkon të marrë menjëherë në dorë Inter-in dhe synon ta bëjë këtë nëpërmjet merkatos.
Ideja kryesore e Marotta-s dhe Ausilio-s është të bëjnë një tentativë me Cagliari-n për të marrë që në janar Nicolo Barella-n. Mesfushori 20-vjeçar shihet si lojtari ideal për të kompletuar mesfushën në këtë sezon. Një operacion që mund të ketë një kosto 40 milionë euro.
Blerja e dytë e madhe do të bëhet përsëri në mesfushë, por do të realizohet në qershor dhe do të jetë e nivelit të lartë. Modric mbetet ëndrra, Milinkovic-Savic dhe Kroos alternativat. Avantazhi kryesor i zikaltërve për të realizuar operacione të tilla janë marrëdhëniet e mira që Marotta ka me klubet kryesore të Europës.
Më pas do të ketë një ndryshim edhe në stol. Pavarësisht përgënjeshtrimeve të bëra këto ditë, Spalletti nuk është zgjedhja e parë e Marotta-s dhe, me përjashtim të surprizave, drejtimin e ekipit milanez do të marrë Antonio Conte, sipas “Corriere dello Sport”.
