Me shifrat nuk mund të gabosh kurrë: Manchester City i Pep Guardiola-s, skuadër e marrë si shembull për moshën mesatare shumë të ulët të lojtarëve dhe për lojën spektakolare të këtij viti, është klubi që ka më shumë lojtarë të huaj në përbërje mes 5 kampionateve kryesore të Europës.
Sipas studimit të “Cies Observatory”, 77,3% e organikës së “Qytetarëve” është e përbërë nga lojtarë që nuk janë anglezë, pavarësisht se në sezonet e fundit janë blerë futbollistë, si Walker, Stones dhe Sterling. Në fakt, janë vetëm katër futbollistët anglezë nën urdhrat e Pep Guardiola-s. Në vendin e dytë të kësaj renditjeje të veçantë pozicionohet Chelsea i Antonio Conte-s. “Blutë” kanë në përbërje 16 atletë të huaj nga 21 të aktivizuar deri tani në kampionat (76,2%).
