Në Spanjë janë të sigurtë. Inter, pasi tentoi dhe dështoi verën e kaluar të sillte në Milano nënkampionin e botës Luka Modric, tani synon të sjellë në Serinë A një tjetër futbollist kroat. Bëhet fjalë për Ivan Rakitic, edhe ai nënkampion bote me Kroacinë.
Beppe Marotta synon një blerje “big” në mesfushë dhe Rakitic konsiderohet i përshtatshmi për skuadrën zikaltër, ku do të luante si titullar. Gjë të cilën kroati nuk arrin ta kryejë prej kohësh te Barcelona, skuadra e tij aktuale.
Mësohet se skuadra zikaltër ka bërë edhe ofertën e parë zyrtare, 90 milionë euro për mesfushorin 30-vjeçar. Por problem është klauzola prej 120 milionë eurosh që lojtari ka me ekipin “blaugrana”. Por Marotta beson se ky ngërç prej 30 milionë eurosh do të kalohet gjatë bisedimeve.
Inter, nga ana tjetër, për të bindur lojtarin të vishet me fanellën zikaltër, i ofron një rrogë prej 5 milionë eurosh në sezon. Një shumë që është e përafërt me atë që lojtari kroat merr aktualisht te Barcelona.
