Gjithkush dëshiron ta shohë Messin në veprim, kjo është normale, sepse po flasim për futbollistin më të mirë në botë. Kthimi i tij në kombëtaren e Argjentinës iu mundëson më shumë tifozëve të futbollit ta shijojnë këtë lojtar, jo vetëm duke bërë mrekulli me katalanasit. Prandaj, zhgënjimi dhe zemërimi i Federatës së Futbollit të Marokut, duke e ditur se Leo Messi nuk do të marrë pjesë në miqësoren e së martës (ora 16:00) në Tangier, është i madh.
Ylli i Barcelonës luajti 90 minuta në ndeshjen miqësore kundër Venezuelës, në “Wanda Metropolitano”, që Argjentina e humbi 3-1, pavarësisht kthimit “nën armë” të pesë herë fituesit të “Topit të Artë”. Pas kësaj ndeshjeje, shërbimet mjekësore të kombëtares argjentinase lëshuan një deklaratë, që pasqyronte një lëndim të vogël të Leos, që do ta pengonte atë të luante miqësoren e dytë, kësaj here ndaj Marokut.
Sulmuesi argjentinas u kthye në Barcelonë, në vend që të shkonte në Tangier, por Maroku pretendon se nuk është zbatuar kontrata mes dy federatave për këtë miqësore. Federata Marokene e Futbollit i kërkoi shpjegime homologes argjentinase për mungesën e Messit, duke i përmendur kontratën. Sipas marrëveshjes, Argjentina duhet të paraqitet me kombëtaren A në miqësoren me ta.
Maroku e ka planifikuar ndeshjen kundër Argjentinës në përgatitje për Kupën e Afrikës, që do të luhet në Egjipt prej 21 qershorit deri më 19 korrik, por nuk do të jetë në gjendje të përballet me Leo Messin. Kapiteni i katalanasve tashmë është duke pushuar në shtëpinë e tij në Barcelonë, duke pritur ndeshjen e radhës të La Liga-s, derbin kundër Espanyol, që do të zhvillohet në “Camp Nou”, të shtunën.
