Luis Figo ka pohuar se kapiteni i Real Madridit, Sergio Ramos, meriton ta fitojë “Topin e Artë”. Luka Modric e mori këtë trofe prestigjioz individual në vitin 2018, duke i dhënë fund dominimit të dyshes Lionel Messi dhe Cristiano Ronaldo në dekadën e fundit.
“Është e qartë se Sergio Ramos e meriton ta fitojë “Topin e Artë”, – tha Figo për “Marca”. – Duke qenë mbrojtës, është pothuajse si të luajë portier, prandaj bëhet shumë më e vështirë për ta fituar çmimin, por Fabio Cannavaro e bëri këtë në vitin 2006. Kjo gjë varet edhe nga momenti, por nëse i referohemi vetëm cilësisë, është e qartë se Ramos duhet ta fitojë“.
Karriera e Luis Figo ka të ngjarë të kujtohet më shumë për transferimin e tij të diskutueshëm nga “Camp Nou” në “Bernabeu”. Në këtë pikë, portugezi shtoi: “Kur të jepet një shans, gjithmonë mendon se do të jetë për mirë. Ai transferim synonte përmirësimin në çdo aspekt; ekonomikisht, në prestigj dhe për të fituar tituj. Kur kam nënshkruar për Interin, ishte thjesht një veprim në kërkim të lumturisë si futbollist“.
Ish-futbollisti elegant ka kaluar nëpër duart e trajnerëve të njohur në kohën e tij, por veçoi Johan Cruyff mbi të tjerët: “Unë kam pasur fatin e mirë për të punuar me Cruyff. Ai ishte një mjeshtër, sa i përket filozofisë së futbollit të bukur sulmues. Kam mësuar shumë prej tij. Queiroz ishte trajneri im me ekipin kombëtar, por me skuadrat e tjera kam punuar me Del Bosque dhe Mourinho. Eshtë e vështirë të zgjedhësh mes tyre, pasi ishin të gjithë të rëndësishëm për mua“.