Cristiano Ronaldo është një nga futbollistët më të mirë në botë dhe natyrisht një nga më të preferuarit jo vetëm nga fansat, por edhe sponsorët e shumtë ndërkombëtarë, që zgjedhin pikërisht portugezin, për ta bërë imazh të produkteve të tyre.
Së fundi një lëvizje për të përfituar nga emri i tij, po mendon të bëjë edhe klubi ku Ronaldo u rrit, Sporting Lisbona, që po mendon të shtojë emrin e CR7-ës në stadiumin aktual, që mban emrin e themeluesit të klubit, “Jose Alvalade”.
Synimi i portugezëve është që ta quajnë stadiumin “Jose Alvalade CR7”, për të përfituar më shumë nga marketingu, por edhe për të bindur portugezin, që vitet e fundit të karrierës, ti kalojë pikërisht në Lisbonë.
Vlen të përmendet se Cristiano Ronaldo iu bashkua Sportingut të Lisbonës kur ishte vetëm 12 vjeç dhe pas 5 vitesh në skuadrat e moshave, debutoi në vitin 2002 me ekipin e parë, ndërsa në fund të sezonit bindi Fergusson që të paguajë për transferimin e tij në Manchester.
