Mesfushori belg Kevin de Bruyne ka lënë fushën e lojës në minutën e 38-të në ndeshjen që Manchester City fitoi 1-0 ndaj Tottenham sot në Premier League. Një dëmtim në këmbën e majtë ka detyruar mesfushorin e City të braktisë lojën, duke vënë në dyshim praninë e tij të mërkurën e ardhshme, në derbin ndaj Manchester United.
“Nuk kam biseduar ende me lojtarin apo me mjekët, por di vetëm që është një dëmtim muskulor. Nuk mund të them ende se sa i rëndë është ky dëmtim i Kevin, por nesër do të mësojmë diçka më konkrete. Gjithsesi, mendoj se ai do të mungojë në ndeshjen e radhës ndaj United”, u shpreh Pep Guardiola pas përfundimit të ndeshjes.
Ky është dëmtimi i radhës gjatë këtij sezoni për Kevin de Bruyne, që fillimisht mungoi në fillimin e kampionatit, për shkak të një problemi në gjurin e djathtë. Më pas ai mungoi për 6 javë në nëntor, pasi i dëmtua në gjurin e majtë. Këtë sezon ai ka luajtur vetëm 15 ndeshje në Premier League, por rikthimi i tij ishte i rëndësishëm në rikuperimin që City bëri ndaj Liverpool.