Pas stadiumeve të Elbasanit dhe Shkodrës, “Arenës Kombëtare” që është pranë përfundimit, si dhe “Zeqir Ymerit” në Kukës që pritet të nisë punimet, një tjetër impiant në Shqipëri bëhet gati për investime.
Ditën e sotme, presidenti i FSHF-së, Armand Duka, zhvilloi një takim me kryetarin e Bashkisë së Fierit, Armando Subashin, si dhe presidentin e klubit të Apolonisë së Fierit, Koço Kokëdhimën, me qëllim kryesor bashkëpunimin për nisjen e punimeve në stadiumin e Fierit.
Pas këtij takimi, është rënë dakord që të fillojë puna në “Loni Papuçiu”, për një stadium që do të shkojë deri në 6000-8000 vende. FSHF pritet të paguajë për 1/3-tën e investimit, ndërsa pjesa tjetër do të mbulohet nga Qeveria dhe Bashkia Fier.
