Ermir Lenjani ka marrë si “dhuratë” për ditëlindje praninë në formacionin ideal të javës në Zvicër. Në fakt ka qenë një përzgjedhje shumë e merituar ajo e futbollistit shqiptar, përtej festimeve të 30-vjetorit të tij.
Lenjani ishte protagonist në fundjavë ndaj Zyrihut me një gol spektakolar, duke ndihmuar skuadrën e tij të fitonte 3-1. Gjuajtja e tij diagonale mbi portierin ka hapur shumë diskutime nëse ishte e menduar apo një kros që shkoi gabim, por në përshkrimin për futbollistin kuqezi, “Blick” e cilëson atë “jashtëzakonisht punëtor në krahun e majtë”.
Në formacionin më të mirë të kësaj jave nuk kishte si të mungonte edhe Pajtim Kasami, i cili realizoi dy golat e tjerë për Sionin duke kontribuuar te ky sukses i rëndësishëm.
Ndërkohë, në formacionin e zhgënjimeve të javës ka përfunduar si rrallëherë Benjamin Kololli. Arsyeja është ajo penallti e humbur ndaj Sionit, ku ai goditi pjesën e jashtme të shtyllës, duke humbur më pas besimin e duke bërë disa gabime deri në fundin e ndeshjes.
