I ftuar në një event të Fondacionit PUPI, Havier Zaneti komentoi dje se përse zgjodhi një post drejtuesi përpara rolit të trajnerit tek Interi dhe shpjegoi edhe lidhjen e veçantë me tifozët zikaltër. “Për mua është e rëndësishme që të vazhdoja lidhjen me klubin”, u shpreh ish-kapiteni.
“Tifozët janë shpirti i kësaj skuadre, na mbështesin gjithnjë dhe i qëndrojnë gjithmonë pranë ekipit. Tërheqja? Ishte një emocion i madh, edhe pse tejmbushën ‘San Siron’ për ndeshjen time të fundit. Për mua ishte shumë e rëndësishme që të rikthehesha pas dëmtimit të rëndë dhe luajta edhe një sezon të fundit për t’i dhënë lamtumirën ‘San Siros’.
Roli i ri? Doja që të bëhesha i dobishëm për Interin me një vizion 360 gradë, jo vetëm sportiv. Interi po zgjerohet ndërkombëtarisht dhe ndjek shumë projekte. Kjo për mua është shumë e rëndësishme, sepse më bën të rritem dhe mësoj. Pse jo trajner? Pikërisht për këtë motiv, sepse doja të provoja gjëra të tjera, të kisha një tjetër vizion. Sezoni aktual? Skuadra ka besim të madh. Djemtë po impenjohen, por duhet të mendojmë ndeshje pas ndeshje”.
