Genaro Gattuso ka marrë triumfin e parë si trajner i Napolit mbrëmjen e kaluar, në një sfidë që u zgjidh vetëm në fund ndaj Sassuolos. Viti u mbyll me tre pikë dhe kjo është e rëndësishme, me trajnerin italian që duket se ka nisur të mendojë menjëherë për merkaton tashmë.
Sipas asaj që zbulon “Sky”, numri një i stolit napolitan ka rrëfyer edhe dëshirën e parë për merkaton, teksa i ka kërkuar drejtuesve të Napolit të sjellin në “San Paolo” Sead Kolasinac. Mbrojtësi, i cili luan për Arsenalin nuk po kalon një moment pozitiv në Londër dhe një largim i tij drejt Serie A nuk do të ishte çudi.
Problem mbeten bisedimet me “Topçinjtë” pasi Kolasinac ka edhe 2 vite e gjysmë kontratë me ta dhe zor se Arsenal mund ta lëshojë lehtë boshnjakun. Përveç kësaj, për mbrojtësin e majtë ka shfaqur interes dhe Roma, që e sheh 26-vjeçarin si zëvendësuesin ideal për Kolarov, i cili numëron 34 vite mbi supe tashmë dhe ky sezon mund të jetë i fundit për të me verdhekuqtë.
Gattuso e ka shprehur dëshirën e tij për të pasur në ekip Kolasinac, tashmë mbetet për t’u parë se sa do të arrihet kjo gjë nga drejtuesit e Napolit.
