Azdren Llullaku ishte një nga synimet madhore të Kukësit në këtë merkato, por sulmuesi ka zgjedhur të rikthehet në Rumani, duke firmosur për skuadrën e Konkordias, që militon në Ligën e Dytë. Ndodhi ashtu siç ishte paralajmëruar në numrin e së shtunës nga “Panorama Sport”, teksa sulmuesi refuzoi Kukësin për shkak se nuk e bindi oferta.
Sipas asaj që edhe vetë Llullaku ka sqaruar, vendimi erdhi edhe për shkak se ai ka familjen në Rumani dhe duhet të qëndrojë pranë saj. Të shtunën Llullaku bëri prezantimin te skuadra e re, teksa i është besuar numri 10 në fanellë.
Kjo është eksperienca e katërt e 32-vjeçarit në futbollin rumun, pasi më parë ka luajtur me Gaz Metan, Poli Iashi dhe Astra. Kujtojmë që në vitin 2016 ai u shpall golashënuesi më i mirë i kampionatit, duke u thirrur më pas edhe nga Kombëtarja shqiptare.
