Real Madrid ka rimarrë vendin e parë në La Liga pas fitores 4-1 kundër Huesca-s në javën e tetë të kampionatit.
Madrilenët kanë harruar barazimin zhgënjyes të marrë në Champions League kundër Borussia Monchegladbach dhe do të paraqiten me moral të lartë në ndeshjen e madhe kundër Inter-it pas tri ditësh.
Zinedine ka patur në dispozicion më në fund treshen titullare të sulmit, atë të studiuar pikërisht për ndeshjen e Champions-it kundër Inter-it: Asensio-Benzema-Hazard.
Ka qenë pikërisht belgu që ka zhbllokuar ndeshjen me një gol të mrekullueshëm në minutën e 40-të. Ky ka qenë realizimi i dytë i ish-yllit të Chelsea-t me Real-in në të gjitha kompeticionet, i pari që nga tetori i 2019-ës kundër Granada-s, 392 ditë më parë.
Protagonistët e tjerë të ndeshjes kanë qenë Benzema, autor i golit të dytë dhe të katërt të madrilenëve, Valverde, auto i golit të tretë dhe Ferreiro, autori i golit të vetëm të miqve.
Ka qenë një ndeshje speciale për Sergio Ramos, që është bërë lojtari i 10-të me 500 ndeshje në historinë e La Liga-s dhe mbrojtësi i tretë që e arrin këtë shifër, pas Manolo Sanchis (523) dhe Miguel Soler (504).
