Nuk kanë fund “dhimbjet e kokës” për trajnerin Andrea Pirlo. Si të mos mjaftonte humbja ndaj Napolit në kampionat, tekniku italian është në hall të madh në prag të sfidës ndaj Portos, që do të zhvillohet ditën e mërkurë, e vlefshme për Ligën e Kampionëve.
Pas mesfushorëve Arthur dhe Ramsei, si dhe sulmuesit Dibala, në dyshim për sfidën ndaj Portos është edhe kolumbiani Kuadrado. Futbollisti pësoi një dëmtim në ndeshjen e djeshme ndaj Napolit, ku u zëvendësua nga Aleks Sandro.
Sipas “Goal.com”, ai i është nënshtruar ditën e sotme testeve mjekësore dhe pritet të mungojë në dy sfidat e ardhshme të bardhezinjve, ato me Porton dhe Krotonen. Gjithçka pritet të konfirmohet ditën e nesërme.