Mbrojtësi Andi Hadroj dukej shumë pranë Partizanit, por duke qenë se është nën kontratë deri në dhjetor me klubin ballshiot, të kuqtë u tërhoqën nga ky transferim.
E për më tepër, kanë siguruar shërbimet e Gligorovit. Gazeta mëson se vetë mbrojtësi Hadroj ka qenë gjithë kohës pro një kalimi te Partizani.
22-vjeçari do të presë derisa kontrata e tij me Bylisin të skadojë dhe në janar të jetë i lirë të bisedojë me klube të tjera. Bisedimet mes Partizanit dhe mbrojtësit Bekim Dida janë ndërprerë përfundimisht.
Edhe pse lojtari i Korabit ka bërë paraqitje shumë të mira dhe ishte në bisedime me klubin e Partizanit, “demat” kanë preferuar të ndërpresin gjithçka, pasi janë kompletuar në prapavijë. Belica, Sota, Shehi dhe Damçevski duket se do të jenë katër lojtarët që do të luftojnë për dy pozicionet e qendrës së mbrojtjes gjatë gjithë sezonit të ardhshëm.
