Ish-mesfushori i Francës, Samir Nasri ka njoftuar ditën e sotme tërheqjen nga futbolli i luajtur. Marsejezi i cili ndodhej pa klub që nga 30 qershori i vitit 2020 ku përfundoi bashkëpunimin me skuadrën belge të Anderlehtit, ka “varur këpucët në gozhdë” në moshën 34-vjeçare.
Gjatë një interviste me mikrofonat e “JDD”, ish-mesfushori i Arsenalit dhe Mançester Sitit ku fitoi dhe me këtë klub dy tituj kampionë në Premier Ligën angleze, sqaroi opinionin publik përse e ndërmori këtë hap.
“Një episod më lëndoi shumë dhe ndryshoi marrëdhënien time me futbollin: skualifikimi im. Unë nuk kisha marrë asnjë produkt doping. Ishte thjesht një injeksion me vitaminë sepse isha i sëmurë.”
Nasri u pezullua për 18 muaj nga UEFA në shkurt të vitit 2018 për shkelje të rregullave anti-doping.
Gjithashtu francezi përveç Anderlehtit, Mançester Sitit dhe Arsenalit më parë ka mbajtur veshur edhe fanellat e Marsejës, Sevijas dhe Uest Hemit.
Përveç dy titujve me skuadrën nga Mançesteri ai me këtë klub fitoi edhe Kupën e Anglisë.
