Armando Broja përballet këtë fundjavë me të kaluarën e tij, me një pjesë shumë të rëndësishme të saj. Sulmuesi i përfaqësues kuqezi luan me Sauthemptonin kundër Evertonit i cili drejtohet nga një ikonë e Çelsit, si Frenk Lampard. Ky i fundit ishte trajneri i parë i skuadrës londineze kur Broja shënoi debutimin e tij në elitën e futbollit anglez në vitin 2020 me fanellën e bluve.
Ndaj ai njeh mirë cilësitë e lojtarit, të cilin asokohe e shihte si një emër shumë premtues për të ardhmen e klubit. Bindje që ka shprehur edhe në konferencën e sotme për shtyp para duelit.
“Jam unë ai që i dha debutimin e tij. Ai është një djalë i mbarë, një i ri shumë i talentuar. Ai është i shpejtë, i fortë, ka sy për golin. Ai është një lojtar i ri shumë i mirë, ndaj jam i ndërgjegjshëm për forcën e tij”, theksoi Lampard para mediave për sulmuesin shqiptar.
